Gwamnatin Tarayya Ta Amince Da Ɗaga Darajar Asibitin Kwararru na Katsina Zuwa Asibitin Koyarwa

0
180

 

Gwamnatin Tarayya, ta hannun Ma’aikatar lafiya ta Tarayya, ta amince da a daga darajar  asibitin  kwararru (Federal Medical Center) dake Katsina ya zuwa asibitin koyarwa ta Tarayya domin Jami’ar Umaru Musa Yar’adua tayi amfani dashi wajen gudanar da Digiri a fannin likitanci (Medicine).

Wannan amincewa, tana cikin wata yarjejeniyar fahimtar juna da kuma aiki tare da Gwamnatin ta Tarayya a bangare daya da kuma Gwamnatin Jihar Katsina a daya bangaren suka sa ma hannu.

Gwamna Aminu Bello Masari shi yasa hannu a kan wannan yarjejeniya a madadin Gwamnatin Jihar Katsina a yayin da kuma Ministan Lafiya na kasa Dr Osagie Emmanuel Ehanire yasa hannu a madadin Gwamnatin Tarayya.

Daga cikin wadanda suka halarci taron sun hada da Ministan kasa a ma’aikatar lafiya Senator Olurunimbe Mamora da Babban Sakataren Ma’aikatar lafiya ta kasa Alhaji AbdulAzeez Abdullahi Mashi da Shugaban asibitin kwararru ta Katsina Dokta Suleiman Bello Muhammad da sauran daraktocin wannan ma’aikata.

Mai ba Gwamnan Jihar Katsina Shawara a bangaren ilimi mai zurfi Bashir Muhammad Ruwan Godiya da kuma Shugaban jami’ar Umaru Musa Yar’adua Farfesa Sanusi Mamman da kuma wasu manyan jami’an Gwamnatin jiha suka rufa wa Gwamnan baya.

Akwai kuma kungiyar Dattawan jihar Katsina, a karkashin jagorancin Alhaji Aliyu Balarabe Saulawa da taka muhimmiyar rawa wajen ganin an cimma wannan burin. Sanata Mamman Abubakar Danmusa da Alhaji Nalado Yusuf Daura suna cikin Dattawan da suka halarci wannan taro.

LEAVE A REPLY

Please enter your comment!
Please enter your name here